அரச உத்தியோகத்தர்களுக்கான உள்நாட்டு மற்றும் வெளிநாட்டு சம்பளமற்ற விடுமுறைகளை அனுமதிப்பதை உடனடியாக அமுலுக்கு வரும் வகையில் இடைநிறுத்த பொது நிர்வாக, மாகாண சபைகள் மற்றும் உள்ளூராட்சி அமைச்சு தீர்மானித்துள்ளது.
நவம்பர் மாதம் 24 ஆம் திகதி நடைபெற்ற அமைச்சரவைக் கூட்டத்தில் எடுக்கப்பட்ட தீர்மானத்திற்கு அமைய இந்த நடவடிக்கை எடுக்கப்படுவதாக, அது தொடர்பான சுற்றறிக்கையை வெளியிட்டு பொது நிர்வாக, மாகாண சபைகள் மற்றும் உள்ளூராட்சி அமைச்சின் செயலாளர் எஸ். ஆலோக பண்டார தெரிவித்துள்ளார்.
அதற்கமைய, புதிய விடுமுறை விண்ணப்பங்கள் அல்லது விடுமுறை நீடிப்பிற்கான விண்ணப்பங்களை ஏற்றுக்கொள்வதை உடனடியாக அமுலுக்கு வரும் வகையில் இடைநிறுத்த வேண்டும் என அமைச்சின் செயலாளர், அனைத்து அமைச்சுக்களின் செயலாளர்கள், மாகாண பிரதம செயலாளர்கள் மற்றும் திணைக்களத் தலைவர்களுக்கு குறித்த சுற்றறிக்கையின் மூலம் அறிவித்துள்ளார்.
சிரேஷ்டத்துவம் மற்றும் ஓய்வூதியத்திற்கு பாதிப்பு ஏற்படாத வகையில் அரச உத்தியோகத்தர்களுக்கு அதிகபட்சம் 5 வருடங்களுக்கு உட்பட்டு உள்நாட்டு மற்றும் வெளிநாட்டு சம்பளமற்ற விடுமுறைகளைப் பெற்றுக்கொள்ள சந்தர்ப்பம் வழங்கி, 2022 ஆம் ஆண்டு ஜூன் மாதம் 22 ஆம் திகதி முதல் அமுலாகும் வகையில் பொது நிர்வாக சுற்றறிக்கை ஒன்று வெளியிடப்பட்டிருந்தது.
எவ்வாறாயினும், அமைச்சரவையின் தீர்மானத்திற்கு அமைய, அந்த சுற்றறிக்கையில் குறிப்பிடப்பட்டுள்ள ஏற்பாடுகளின் கீழ் உள்நாட்டு மற்றும் வெளிநாட்டு விடுமுறைகளை அனுமதிப்பதை உடனடியாக அமுலுக்கு வரும் வகையில் இடைநிறுத்த நடவடிக்கை எடுக்கப்பட்டுள்ளதுடன், தற்போது உள்நாட்டு, வெளிநாட்டு விடுமுறைகளைப் பெற்றுள்ள உத்தியோகத்தர்களுக்கு அனுமதிக்கப்பட்ட காலப்பகுதிக்கு மட்டும் அந்த விடுமுறையைப் பெற்றுக்கொள்ளும் வசதி உள்ளதாகக் குறிப்பிடப்பட்டுள்ளது.
இதுவரையில் விடுமுறைக்கான அனுமதியைப் பெற்று, அந்த விடுமுறையைக் கழிக்கும் எதிர்பார்ப்பில் உள்ள உத்தியோகத்தர்களுக்கு, அனுமதிக்கப்பட்ட காலப்பகுதிக்கு அமைவாக விடுமுறையைப் பெற்றுக் கொள்ளும் வசதி உள்ளதாக பொது நிர்வாக அமைச்சு வெளியிட்ட சுற்றறிக்கையில் தெரிவிக்கப்பட்டுள்ளது.
அத்துடன், வெளிநாட்டு விடுமுறையைப் பெற்றுக் கொள்வதற்காக தற்போது சமர்ப்பிக்கப்பட்டுள்ள, அனைத்துத் தேவைகளையும் பூர்த்தி செய்துள்ள புதிய விடுமுறை விண்ணப்பங்கள் மற்றும் விடுமுறை நீடிப்பு விண்ணப்பங்களுக்கு புதிய சுற்றறிக்கையினால் பாதிப்பு ஏற்படாது என சுட்டிக் காட்டப்பட்டுள்ளது.
எவ்வாறாயினும் தேவைகளைப் பூர்த்தி செய்யாத மற்றும் சமர்ப்பிக்க வேண்டிய ஆவணங்களில் குறைபாடுகள் உள்ள விடுமுறை விண்ணப்பங்கள் மீள் பரிசீலனை இன்றி நிராகரிக்கப்படும் எனவும் சுற்றறிக்கையில் குறிப்பிடப்பட்டுள்ளது.
அத்துடன் உள்நாட்டு விடுமுறைக்காக சமர்ப்பிக்கப்பட்டுள்ள விடுமுறை விண்ணப்பங்களுக்கு அனுமதி வழங்கப்பட மாட்டாது என பொது நிர்வாக அமைச்சு வெளியிட்டுள்ள புதிய சுற்றறிக்கையில் தெரிவிக்கப்பட்டுள்ளது.
இலங்கையில் அண்மையில் ஏற்பட்ட பேரிடரினால் உயிரிழந்தோர் எண்ணிக்கை 607 ஆக உயர்வடைந்துள்ளது.
மழை வெள்ளம், புயல் மற்றும் மன்சரிவு போன்ற இயற்கை பேரனர்த்தங்களினால் இதுவரையில் 607 பேர் உயிரிழந்துள்ளதாக அரசாங்கம் அதிகாரப் பூர்வமாக தகவல் வெளியிட்டுள்ளது.
மேலும் இந்த அனர்த்தங்கள் காரணமாக இன்னமும் 214 பேர் காணாமல் போய் உள்ளதாக தெரிவிக்கப்படுகிறது.
வட மாகாணத்தின் முக்கிய கல்வி நிர்வாக வலயங்களில் ஒன்றாகிய வவுனியா வடக்கு, போர் பிந்தைய காலத்தில் பல துறைகளில் மாற்றங்களை அனுபவித்து வருகிறது. உட்கட்டமைப்பு, பொருளாதாரம், குடியேற்றம், அரசியல் ஆகிய துறைகளில் ஏற்பட்ட மாற்றங்களுக்கு இணையாக, கல்வித் துறையும் பல சவால்களைச் சந்தித்து வருகிறது.
அண்மைக் காலத்தில்,
மாணவர்களின் கல்விப் பெறுபேறுகள் வீழ்ச்சி
இடை விலகல் (dropout) அதிகரிப்பு
ஆசிரியர்களின் மனஅழுத்தம்
பெற்றோர்களின் நம்பிக்கையின்மை
என வவுனியா வடக்கின் கல்வி நிலை குறித்து பல பரிமாணங்களில் கேள்விகள் எழுந்துள்ளன. இந்தப் பின்னணியில் “கல்வி அதிகாரிகளின் அசமந்தம்” தொடர்பில் சமூகத்தில் பல விமர்சனக் குரல்கள் உருவாகியுள்ளன.
இந்த ஆய்வின் ஊடாக,
1. வவுனியா வடக்கின் கல்வி நிலையைச் சுருக்கமாக விளக்குதல்
2. கல்வி வீழ்ச்சியின் முக்கிய வடிவங்களையும் காரணிகளையும் ஆய்வு செய்தல்
3. கல்வி அதிகாரிகளின் பங்கு, பொறுப்பு, அசமந்தம் ஆகியவற்றை ஆராய்தல்
4. சாத்தியமான மாற்றுத் தீர்வுகளை முன்வைத்தல்
எனும் குறிக்கோள்களை அடிப்படையாகக் கொண்ட ஆய்வு வடிவில் அமைந்துள்ளது. இவ்வாய்வு, சமூக அனுபவங்கள், பொதுவான கண்காணிப்புகள், கல்விச் செயற்பாடுகள் பற்றிய விடயங்களை அடிப்படையாகக் கொண்ட பகுப்பாய்வு என்பதையும் ஆரம்பத்திலேயே குறிப்பிட வேண்டும்.
வவுனியா வடக்கின் கல்வி அமைப்பு – ஒரு சுருக்கப் பின்னணி
வவுனியா வடக்கு பகுதி பெரும்பாலும் கிராமப்புறத்தை அடிப்படையாகக் கொண்ட களமாகும். பல வருடங்கள் நீடித்த உள்நாட்டுப் போர், இடம்பெயர்வு, முகாம்கள், மீளக்குடியேற்றம் ஆகியவையால் இப்பகுதி மக்களின் வாழ்க்கை அமைப்பும் கல்வி முன்னேற்றமும் பாதிக்கப்பட்டுள்ளன.
போருக்குப் பிந்திய காலத்தில்,
புதிய பாடசாலைக் கட்டிடங்கள்
பாடசாலை உபகரணங்கள்
ஆசிரியர் நியமனங்கள்
போன்றவை ஓரளவு முன்னெடுக்கப்பட்டாலும், கல்வியின் உண்மையான தரம் உயர்ந்ததா என்ற கேள்வி இன்னும் வினாவாகவே நிலைத்திருக்கிறது.
வவுனியா வடக்கு கல்வி வலயத்தில்,
சிறிய அளவிலான ஆரம்ப பாடசாலைகள்,
குறைந்த வசதியுள்ள இடைநிலைப் பாடசாலைகள்,
சில உயர்நிலை கல்லூரிகள்
எனப் பன்முகப் பாடசாலைகள் உள்ளன. ஆனால் இவை அனைத்தும் அதே தரத்தில் செயல்படுகின்றனவா என்பது சந்தேகமே. இந்த தர வேறுபாடு மற்றும் திணைக்களத் திட்டமிடலின் பலவீனங்களுமே கல்வி வீழ்ச்சிக்கான அடிப்படை காரணிகளில் ஒன்றாகக் கருதப்படுகின்றது.
வவுனியா வடக்கில் கல்வி வீழ்ச்சி பல தளங்களில் வெளிப்படுகிறது அந்த வகையில்,
தேர்ச்சி வீத வீழ்ச்சி
புலமைப்பரிசில், சாதாரண தர, உயர் தர பரீட்சைகளில் தேசிய சராசரியை விட குறைந்த தேர்ச்சி விகிதம். குறிப்பாக கணிதம், விஞ்ஞானம் போன்ற முக்கியப் பாடங்களில் அதிக அளவில் சித்தியின்மை. பல பாடசாலைகளில் உயர்தர மாணவர்கள் கூட குறைந்த பெறுபேறுகளுடன் மட்டும் தேர்ச்சி பெறுதல்.
வருகை வீழ்ச்சி
பாடசாலை வருகையானது இடைநிலை மற்றும் உயர்நிலை வகுப்புகளில் குறைவாகக் காணப்படுகின்றது.
அடிப்படைத் திறன்கள குறைவு
முன் கல்வியை வெற்றிகரமாக முடித்தும், சரளமாக வாசிக்க இயலாமை, தங்களின் எண்ணங்களை தெளிவாக எழுத இயலாமை, எளிய கணக்கீடுகளுக்கே சிக்கல் அனுபவிப்பது.
மாணவர்–ஆசிரியர் உறவின் தரம் குறைவு
பரஸ்பர நம்பிக்கை, மரியாதை, ஊக்கம் ஆகியவை குறைந்து, “பாடசாலையில் படிப்பது பயனற்றது” என்ற கருத்து சில மாணவரிடம் உருவாகுதல். போன்ற எல்லா வெளிப்பாடுகளும் இணைந்து, வவுனியா வடக்கில் கல்வி வீழ்ச்சி காணப்படுகின்றது. இது ஒரு தனிநபர் மட்டப் பிரச்சினை அல்ல; அமைப்பு மட்டப் பிரச்சினை என்பதையே ஆய்வுகள் வெளிப்படுத்துகின்றன.
இங்கு கல்வி அதிகாரிகள் என்பவர்கள் யார்?
மாகாண கல்வி அமைச்சு / மாகாண கல்வி செயலாளர்
மாகாண கல்வித் திணைக்களம்/ மாகாண கல்விப் பணிப்பாளர்
வலயக் கல்வி அலுவலகம்/ வலயக் கல்விப் பணிப்பாளர்
கோட்டக் கல்வி அலுவலகம் / கோட்டக் கல்வி அலுவலர்கள்
பாடசாலைகள் அதிபர்கள் / ஆசிரியர்கள்
உதவிக் கல்விப் பணிப்பாளர்கள் – பாடம்,
ஆசிரிய ஆலோசகர்கள்/ பாட வளவாளர்கள் ஆகியோர் நிர்வாக வட்டாரத்தைச் சேர்ந்தவர்களாகும்.
அதிகாரிகளின் அடிப்படைப் பொறுப்புகள்
கல்விக் கொள்கைகளை செயல்படுத்தல் – தேசிய மற்றும் மாகாண கல்விக் கொள்கைகளை பாடசாலைகளுக்கு கொண்டு சென்று, அவை நடைமுறையில் அமுல்படுகிறதா என உறுதிசெய்தல்.
2. ஆசிரியர் மற்றும் பாடசாலைக் கண்காணிப்பு – வகுப்பு கண்காணிப்பு, பாடத்திட்ட முன்னேற்றம், கற்பித்தல் தரம், பரீட்சை முறைகள் ஆகியவற்றை மதிப்பாய்வு செய்தல்.
3. திட்டமிடல் மற்றும் வளவளப் பகிர்வு – ஆசிரியர் நியமனங்கள், பயிற்சிகள், உபகரண விநியோகம், கட்டிடடங்கள் முதலியவற்றை திட்டமிட்டு ஒழுங்குபடுத்துதல்.
4. தர மேம்பாட்டு நடவடிக்கைகள் – குறைவான தேர்ச்சி வீதம் உள்ள பாடசாலைகளுக்கு சிறப்பு உதவி திட்டங்கள், பயிற்சிகள், மாணவர் ஆதரவு நிகழ்வுகள் ஆகியவற்றை முன்னெடுத்தல்.
இந்தப் பொறுப்புகள் சரியான முறையில் செயல் படுத்தப்படாமல் போகும் போது “அசமந்தம்” என்ற குற்றச்சாட்டு எழுகிறது.
வவுனியா வடக்கில் கல்வி அதிகாரிகளின் அசமந்தம் பற்றி கூறும் போது, அது பல வகைகளில் வெளிப்படுகிறது.
சில பாடசாலைகளில், மாதங்கள் கடந்தும் கல்வி திணைக்கள அதிகாரிகளின் மேற்பார்வை இன்றி இயங்கும் நிலை.
2. அறிக்கைகளில் பார்வை செய்யப்பட்டதாகக் காட்டப்பட்டாலும், உண்மையில் நேரடி வகுப்பு கண்காணிப்பு நடைபெறாத சூழ்நிலை.
3. உண்மையான பாட அடைவு, மாணவர் முன்னேற்றம், தனிநபர் வேறுபாடு போன்றவற்றை ஆராயாமல், “பரிந்துரை”, “குறிப்பு” என காகிதத்தில் மட்டும் செயல்கள் பூர்த்தி செய்யப்படுதல். அதனால், ஆசிரியர்கள் உண்மையிலேயே தரம் உயர்த்தப் போராட வேண்டிய அவசியத்தை உணராமல் போகிறார்கள்.
4. பரீட்சை முடிவுகள், வருகை விவரங்கள், இடை விலகல் பிரச்சினை உள்ள பாடசாலைகள் பற்றிய தரவு சேகரிப்பு தொடர்ந்து நடைபெறுகின்றது. ஆனால், “இந்தத் தரவின் அடிப்படையில் எத்தனை தர மேம்பாட்டுத் திட்டங்கள் நடைமுறைக்கு வந்தன?” என்ற கேள்விக்கு தெளிவான பதில் இல்லை.
பொறுப்புக்கு பதில் காரணங் கூறுதல்
ஆசிரியர் பற்றாக்குறை, நிதி குறைவு, போக்குவரத்து சிரமம், பெற்றோர் ஒத்துழைப்பு இல்லாதது போன்றவற்றை முன்வைத்து, நிர்வாகத் தரப்பு தமது பொறுப்பைத் தட்டிப்போடும் மனப்போக்கு. சில சமயங்களில் நிர்வாக அழுத்தம், உள்நிலை முரண்பாடுகள் காரணமாக நீதி, சமநிலை ஆகியவை பாதிக்கப்படுவது தொடர்பிலும் சமூகத்தில் பேசப்படுகின்றன.
குறைந்த தேர்ச்சி வீதம் குறித்து ஒவ்வொரு ஆண்டும் ஒரே மாதிரியான விவாதங்கள், கூட்டங்கள், அறிக்கைகள், இடம்பெற்றாலும் 3–5 ஆண்டு காலப் பாடத்திட்டத்தை நோக்கிய மூலோபாயத் திட்டங்கள் (strategic plans) இல்லாமை. இதுவே சமூகத்தில் “கல்வி அதிகாரிகள் அசமந்தமாக இருக்கிறார்கள்; உண்மையான மாற்றத்துக்கு முன்வரவில்லை” என்ற கருத்தை வலுப்படுத்துகிறது.
கல்வி வீழ்ச்சியும் அதிகாரி அசமந்தமும்
கல்வி வீழ்ச்சி என்பது ஆசிரியர் மட்டத்தினரின் குறைபாடு மட்டும் அல்ல; அதில் திணைக்கள நிர்வாகத்தின் செயலின்மை மிகப்பெரிய பங்கு வகிக்கிறது.
ஒருவரும் தீவிரமாக கண்காணிக்காத இடத்தில், சில பாடசாலைளில் வகுப்பு ஒழுங்கு, பாட முன்னேற்றம், பரீட்சை தயாரிப்பு ஆகியவை தளர்வாக இருப்பது இயல்பாகிறது.
சில எளிதில் அதிகாரிகளால் அணுகக் கூடிய பாடசாலைகளுக்கு மட்டுமே வாய்ப்புகள், பயிற்சிகள், கூடுதல் உதவி வழங்கப்படுவதுடன் முரண்படும் பாடசாலைகள் புறக்கணிக்கப்படுதல்.
இடை விலகும் மாணவர்களை காப்பாற்ற வல்லுநர் ஆலோசனை, சமூகப் பணி, non-formal education திட்டங்கள் உருவாக்காத நிர்வாகம், பிரச்சினையை அதிகரிக்கச் செய்கின்றது.
ஆதாரம், உரிய முறைப்பாடு இல்லாமல், குற்றம் சுமத்தும், பழி சுமத்தும் முறையில் மட்டுமே கல்வி அதிகாரிகள் பாடசாலையை அணுகும் போது, விசுவாசமாகச் செயற்படும் ஆசிரியர்கள் உற்சாகம் இழக்கின்றனர். இது மாணவர்–ஆசிரியர் உறவையும் நேரடியாக பாதிக்கிறது.
இதனால், கல்வி வீழ்ச்சி மற்றும் கல்வி அதிகாரிகளின் அசமந்தம் ஆகியவை ஒரு நச்சு வட்டமாக செயற்படுகின்றன.
“வவுனியா வடக்கின் கல்வி வீழ்ச்சியை மீட்க, முக்கிய மாற்றமானது நிர்வாக மட்டத்தில் மேற்கொள்வதே அவசியமாகின்றது.”
அந்த வகையில்,
குடும்ப வறுமை போருக்குப் பிந்திய மனநிலை பெற்றோர்களின் கல்வி நிலை சமகால ஊடகத் தாக்கம்
போன்ற காரணிகள் கல்வி வீழ்ச்சிக்கு காரணங்கள் தான். ஆனால், இத்தகைய சிக்கலான சூழலில் கூட, நன்கு திட்டமிடப்பட்ட நிர்வாகம், உறுதியான கல்விக் கொள்கை அமுலாக்கம், தொடர்ச்சியான கண்காணிப்பு இருந்தால், வீழ்ச்சியை பாரியளவு குறைக்க முடியும்.
இந்தப் பின்னணியில், கல்வி அதிகாரிகளின் அசமந்தம் என்பது,
செயற்பட முடியாத அசமந்தமா? செயற்பட விரும்பாத அசமந்தமா?
என்ற இரு கோணங்களிலும் பார்க்க வேண்டியது அவசியமாகின்றது.
இந்த நிலையில் சில வலயங்களில்,
வாகன வசதி இன்மை,
நிதி குறைவு,
ஊழியர் பற்றாக்குறை
போன்ற காரணிகளால் அவர்கள் செயற்பாட்டில் கட்டுப்படுத்தப்படுகிறார்கள்.
ஆனால், அது வவுனியா வடக்கு வலயத்திற்குப் பொருந்தாது. எனினும் அதனையே தமது வீழ்ச்சிக்கான காரணமாகக் கூறிக் கொள்வதே இங்கு பிரச்சினையின் மையமாகக் காணப்படுகின்றது.
மாற்றத்திற்கான சாத்திய வழிகள்
ஆண்டுக்கு ஒரு முறை மேற்பார்வை விழாவை விட, குறைந்த தேர்ச்சி வீதம், இடை விலகல், குறைந்த மாணவர் வருகை கொண்ட பாடசாலைகளுக்கு தொடர்ச்சியான கண்காணிப்பினை மேற்கொள்ளல்.
ஒவ்வொரு பாடசாலைக் கண்காணிப்புக்குப் பின்னர்,
குறைபாட்டுப் பட்டியல்
6–12 மாத செயற் திட்டம்
காலவரையறை மற்றும் பொறுப்பாளர்கள் ஆகியவை எழுத்து பூர்வமாகத் தயாரிக்கப்பட்டு, அதைப் பின்தொடர வேண்டும்.
தேர்ச்சி வீதம், இடை விலகல், வருகை, ஆசிரியர் நியமனங்கள் போன்றவற்றை பெற்றோர்–சமூகத்திற்கு திறந்தவெளியில் பகிர்ந்து கொள்ளும் நிலையை உருவாக்குதல்.
கல்வி அதிகாரிகள் தங்களை வெறும் கணக்கெடுப்பு மற்றும் மேய்க்கும் அதிகாரிகளாக அல்ல, “கல்வி மாற்றத் தலைவர்கள்” எனக் கருதி செயற்படக் கூடிய மனப்போக்கு உருவாக பயிற்சிகளில் ஈடுபடல்.
“தண்டனை” மையமாக அல்ல; மாறாக “ஆதரவு, ஆலோசனை” மையமாக கண்காணிப்பு பணியை மாற்றுதல்.
கல்வி அதிகாரிகளின் பதவி உயர்வு, ஊக்கம், மதிப்பீடு ஆகியவற்றை, அவர்களின் கல்வி வலயத்தில் ஏற்பட்ட கல்வித் தர முன்னேற்றத்துடன் தொடர்புபடுத்துதல்.
கல்வி அதிகாரிகள் நேரடியாக கிராம மக்கள், பெற்றோர், பழைய மாணவர்கள் ஆகியோரை உள்ளடக்கிய கூட்டங்களை திட்டமிட்டு நடத்துதல்.
பாடசாலை மேம்பாட்டுத் திட்டங்களை சமூகத்துடன் பகிர்ந்து கூட்டு பொறுப்பு உணர்வு ஏற்படுத்துதல்.
ஒவ்வொரு கிராமத்திலும் உள்ள தொழில்முனைவோர், அரசு பணியாளர்கள், வெளிநாட்டில் உள்ள ஊரார் ஆகியோரின் ஆதரவைக் கோருவதில் அதிகாரிகள் தூண்டுகோலாக செயல்படுதல்.
ஒவ்வொரு பாடசாலையிலும் இடை விலகும் மாணவரின் விவரம் உடனுக்குடன் கோட்டக் கல்வி அலுவலகத்துக்கு அனுப்பப்படுதல் வேண்டும்.
அந்த மாணவரின் வீட்டுக்குச் சென்று அதிகாரிகள் – ஆசிரியர்கள் – சமூகப் பணியாளர்கள் இணைந்து காரணங்களை ஆய்வு செய்தல் வேண்டும்.
1. சாதாரண கலைத் திட்டத்தில் பொருந்தாத மாணவர்களுக்கு
2. தொழிற் பயிற்சிகளை வழங்குதல்
3. குறுகியகால நுண்திறன் பயிற்சி
4. காலை–மாலை வகுப்புகள்
போன்ற மாற்றுப் பாதைகள் உருவாக்கப்பட வேண்டும்.
வவுனியா வடக்கின் கல்வி வீழ்ச்சி என்பது, போர் பிந்தைய வறுமை, சமூக அமைப்பு சிதைவு, குடும்பப் பொருளாதார அழுத்தம் போன்ற பல காரணிகளின் சகலவித சிக்கல்களையும் தன்னகத்தே தாங்கியுள்ள ஒரு ஆழமான பிரச்சினை.
இச் சூழலில், கல்வி அதிகாரிகள் ஒரு முக்கிய தலையாய வட்டாரமாக இருக்கும் போதும், அவர்களின் அசமந்தம், செயல் பலவீனம், திட்டமிடல் குறைவு ஆகியவை பிரச்சினையை மேலும் கூர்மையாக்குகின்றன.
கல்வி வீழ்ச்சி மற்றும் இடை விலகல் பற்றி பேசும் போது, ஆசிரியர்களையும், மாணவர்களையும், பெற்றோர்களையும் மட்டுமே குற்றம் கூறுவது போதுமானது அல்ல. நிர்வாகமும் தன்னை நேர்மையாகப் பிரதிபலித்துக் கொள்ள வேண்டிய நேரம் இது.
“சரியான நேரத்தில் சரியான முடிவை எடுப்பதே கல்வி நிர்வாகத்தின் உயிர்நாடி; அந்த முடிவு தாமதப்பட்டாலோ, தளர்த்தப்பட்டாலோ, ஒரு தலைமுறை முழுவதும் அதன் விலையை செலுத்த வேண்டியிருக்கும்.”
எனவே,
நிர்வாகத் துல்லியம் விளைவு அடிப்படையிலான திட்டமிடல் உண்மையான கண்காணிப்பு சமூகப் பங்குபற்றல்
இவற்றை முன்னிறுத்தும் மாற்றம்தான் வவுனியா வடக்கின் கல்வி வீழ்ச்சியையும், கல்வி அதிகாரிகளின் அசமந்தத்தையும் மாற்றக்கூடிய வழி என்பதையும் வலியுறுத்துகிறது.
DMC இன்று (04) மாலை 4 மணிக்கு வெளியிட்ட சூழ்நிலை அறிக்கையின்படி, நாட்டில் பேரிடர் ஏற்படுத்திய மோசமான வானிலை காரணமாக 481 பேர் உயிரிழந்துள்ளதாகவும், மேலும் 345 பேர் காணாமல் போயுள்ளதாகவும் உறுதிப்படுத்தப்பட்டுள்ளது.
அத்துடன் 1,814,534 பேர் பாதிக்கப்பட்டுள்ளனர், அவர்களில் 171,492 பேர் அரசாங்கத்தால் நிறுவப்பட்ட 1,236 பாதுகாப்பு மையங்களில் தங்க வைக்கப்பட்டுள்ளனர் எனத் தெரிவித்துள்ளது.
அண்மைய நாட்களில் பரவிய போலிச் செய்திகள், தவறான தகவல்கள், வதந்திகள் மற்றும் சரிபார்க்கப்படாத புதுப்பிப்புகள் அடங்கிய 57 சமூக ஊடக இடுகைகளை போலீசார் அடையாளம் கண்டதையடுத்து, குற்றப் புலனாய்வுத் துறை (சிஐடி) அவசரகால விதிமுறைகளின் கீழ் விசாரணையைத் தொடங்கியுள்ளது.
பரவலாகப் பகிரப்பட்டால், பொதுமக்களுக்கு அச்சத்தை ஏற்படுத்துமா, ஒழுங்கை சீர்குலைக்க முடியுமா அல்லது பதட்டத்தைத் தூண்டுமா என்பதைத் தீர்மானிக்க சிறப்பு சிஐடி பிரிவு தற்போது அவற்றை மதிப்பாய்வு செய்து வருவதாக காவல்துறை தெரிவித்துள்ளது.
பொது பாதுகாப்பு சட்டம் மற்றும் நடைமுறையில் உள்ள அவசரகால விதிமுறைகளின் கீழ், சமூக அமைதியின்மைக்கு வழிவகுக்கும் தவறான தகவல்களை பரப்புவது தண்டனைக்குரிய குற்றமாகும்.
தற்போதைய பேரிடர் மீட்பு நடவடிக்கைகளின் போது சரி பார்க்கப்படாத உள்ளடக்கத்தைப் பகிர்வதைத் தவிர்க்குமாறு காவல்துறை செய்தித் தொடர்பாளர் ASP F. U. Wootler பொது மக்களை வலியுறுத்தினார்.
தவறான தகவல்களைத் தடுக்கவும், பொதுப் பாதுகாப்பைப் பாதுகாக்கவும் சமூக வலைத் தளங்களை போலீஸ் குழுக்கள் உன்னிப்பாகக் கண்காணித்து வருவதாக அவர் கூறினார்.
மன்னார் மாவட்டத்தில் இன்று (03) முதல் மறு அறிவித்தல் வரும் வரை, ஆடு மற்றும் மாட்டு இறைச்சி விற்பனை செய்வதற்கு தற்காலிகத் தடை விதிக்கப்பட்டுள்ளதாக மன்னார் மாவட்ட பொது சுகாதார வைத்திய அதிகாரி தெரிவித்துள்ளார்.
நாட்டில் ஏற்பட்ட வெள்ளப்பெருக்கு காரணமாக மன்னார் மாவட்டத்தில் அதிகளவான கால்நடைகள் உயிரிழந்துள்ளன.
இந்நிலையில், வெள்ளத்தினால் நோய்வாய்ப்பட்ட மற்றும் உயிரிழந்த ஆடு, மாடுகளை இறைச்சியாக்கி விற்பனை செய்வதாகக் கிடைக்கப்பெற்ற முறைப்பாட்டையடுத்தே இந்த நடவடிக்கை எடுக்கப்பட்டுள்ளது.
மிருக வைத்திய அதிகாரியின் ஆலோசனைக்கு அமைவாக, மன்னார் மாவட்டத்திலுள்ள அனைத்து பிரதேச செயலாளர் பிரிவுகளிலும் இந்தத் தடை அமுல்படுத்தப்படுகிறது.
இந்த உத்தரவை மீறி இறைச்சி விற்பனையில் ஈடுபடுவோருக்கு எதிராகக் கடுமையான சட்ட நடவடிக்கை எடுக்கப்படும் என்று எச்சரிக்கப்பட்டுள்ளது.
எனவே, இது விடயமாகப் பொதுமக்கள் விழிப்புடன் செயற்படுமாறும், மறு அறிவித்தல் கிடைக்கும் வரை ஆடு மற்றும் மாட்டு இறைச்சியைக் கொள்வனவு செய்வதைத் தவிர்க்குமாறும் அதிகாரி மேலும் கேட்டுக் கொண்டுள்ளார்.
கொலை குற்றத்திற்கு தயாராகி வந்த குற்றவியல் கும்பல் உறுப்பினரான கரந்தெனிய சுத்தாவின் கூலி கொலையாளியை மீட்டியாகொட பொலிஸார் கைது செய்துள்ளதாக தெரிவிக்கப்படுகின்றது.
சந்தேக நபர் வாழைச்சேனை பகுதியைச் சேர்ந்த 36 வயதுடையவர் என தெரியவந்துள்ளது.
மேலும், அவர் முன்னாள் விடுதலைப் புலி உறுப்பினர் என்பதுடன், அந்தக் காலகட்டத்தில் அவர் கருணா தரப்பில் இருந்ததாக பொலிஸ் விசாரணைகள் தெரிவிக்கின்றன.
சந்தேக நபர் கைது செய்யப்பட்ட போது அவரிடம் இருந்த வெளிநாட்டில் தயாரிக்கப்பட்ட ரிவால்வரையும் பொலிஸார் தேடி வருவதாக தெரிவிக்கப்படுகின்றது.
ஒரு கொள்ளைச் சம்பவம் தொடர்பாக காலி சிறையில் 11 ஆண்டுகள் சிறைத்தண்டனை அனுபவித்து வந்த அவர், அந்த நேரத்தில் தன்னை கரந்தெனிய சுத்தா என்று அடையாளப்படுத்திக் கொண்டதாகக் கூறப்படுகிறது.
கரந்தெனிய சுத்தா நேரடியாக சம்பந்தப்பட்ட நபருக்கு தொலைபேசி அழைப்புகளை மேற்கொண்டு வருவதாகவும் விசாரணைகளில் தெரியவந்துள்ளது.
தென் மாகாணத்திற்குப் பொறுப்பான மூத்த பிரதிப் பொலிஸ் மா அதிபர் கித்சிறி ஜயலத்தின் அறிவுறுத்தலின் பேரில், மீட்டியாகொட பொலிஸார் சந்தேக நபரிடம் மேலதிக விசாரணைகளை மேற்கொண்டு வருவதாக கூறப்படுகின்றது.
கண்டி – ஹுன்னஸ்கிரிய பகுதியில் இராணுவத்தினர் மீட்பு பணியில் ஈடுபட்டிருந்த போது வீட்டின் கீழ்பகுதி ஒன்றில் இருந்து உயிருடன் இருவர் மீட்க்கப்பட்டுள்ளனர்.
பாதி சரிந்த மண்ணிக்குள் சிக்கியிருந்த பெண் ஒருவரையும் ஆண் ஒருவரையும் இராணுவத்தினர் மீட்டுள்ளனர்.
கடந்த 30 ஆம் திகதி ஹுன்னஸ்கிரியவில் இருநது பாரிய மலைத் தொடர் சரிந்து குறித்த அனர்த்தம் ஏற்பட்டுள்ளது.
சீரற்ற வானிலை காரணமாக நாடு முழுவதும் ஏற்பட்ட அனர்த்தங்களினால் உயிரிழந்தோரின் மொத்த எண்ணிக்கை 474 ஆக அதிகரித்துள்ளது. அத்துடன் 356 பேர் காணாமல் போயுள்ளனர்.
நாடு முழுவதும் நிலவும் சீரற்ற வானிலை மற்றும் அனர்த்த நிலைமைகள் காரணமாகப் பாதிக்கப்பட்டவர்களின் விபரங்கள் அடங்கிய அறிக்கையை அனர்த்த முகாமைத்துவ மத்திய நிலையம் இன்று (03) காலை 10.00 மணிக்கு வெளியிட்டுள்ளது.
இதுவரை கிடைக்கப்பெற்ற தகவல்களின்படி, 25 மாவட்டங்களிலும் 448,817 குடும்பங்களைச் சேர்ந்த 1,586,329 பேர் (சுமார் 15 இலட்சத்து 86 ஆயிரத்து 329 பேர்) பாதிக்கப்பட்டுள்ளனர்.
இடம்பெயர்ந்த மக்களுக்காக நாடளாவிய ரீதியில் 1,385 பாதுகாப்பு முகாம்கள் அமைக்கப்பட்டுள்ளன. இம்முகாம்களில் 53,758 குடும்பங்களைச் சேர்ந்த 201,875 பேர் பாதுகாப்பாகத் தங்க வைக்கப்பட்டுள்ளனர்.
மேலும் 971 வீடுகள் முழுமையாகவும், 40,358 வீடுகள் பகுதியளவும் சேதமடைந்துள்ளதாக அனர்த்த முகாமைத்துவ மத்திய நிலையத்தின் அறிக்கையில் குறிப்பிடப்பட்டுள்ளது.
